依稀記得從前年幼時，爸爸會帶我到青龍水上樂園學踩單車（出賣年齡系列），有點年歷嘅朋友就會知道青龍水上樂園是什麼來，它旁邊一併是個單車公園，印象最深刻是它的地面設計是沙地（其實就係冇設計過），所以當所有單車經過萬車奔騰時，大家可以幻想到係沙塵滾滾，何其壯觀，但認真來講係有啲難頂嘅。

但唔好理，細個嘅時候就係覺得好玩。

而媽媽就係傳統家庭主婦，打理家頭細務，照顧屋企日常，記得中午嘅時候仲會哄我同姐姐午睡，會摸吓我哋嘅頭，掃下我哋嘅背脊，仲有個好嘈嘅風扇，然後慢慢就好快瞓着。

但日子漸過，年紀開始長大，可能因為工作或某些原因，反而和屋企人關係越疏離，但其實心裏面是充滿感謝和緊張父母，但可能傳統習慣，總係將這份愛意藏在心裏面。

最近和父親聚餐，細心留意，他已經唔再係我年幼時年輕力壯嘅父親，原來兩邊髪鬢已經長滿好多白髮，臉上眼角額頭多咗好多皺紋，每條皺紋代表著過去多年來的經歷，照顧這個家的重擔，對著父親，幾耐冇用語言表達我嘅愛意，或用行動給他一個擁抱，俾佢感受接收到。

人生最怕就是後悔，遺憾，幾多時候等到對方已經離開，但仲使你有千言萬語也只能藏在心底，愛得太遲。

慢慢長大到校園時代青蔥歲月，對著暗戀明戀單戀相戀嘅對象的憧憬和幻想，腦𥚃面總係有好多小劇場例如第一次的偶遇，從前老土一點的廣告橋段是在汽水機前扮偶遇，幻第一次約會的地方是coffee shop還是公園？幻想第一次拖手的地方是在沙灘上漫步？憧憬第一次接吻是在漆黑的電影院裏，還是送別的屋企樓下？

現在說起來內心也有一份既緊張又甜蜜且羞澀的心情。

由相識，甜蜜，磨擦，冷卻到分離，從這不斷的循環裏面，不多不少，發現有些習慣在不期然地重複，曾幾何時因為內心的掙扎，而錯過給緣份，曾幾何時因磨擦意氣講道理而破壞了這段關係，曾幾何時因為拖延總是認為有下一次機會，然而再沒有表達愛意的機會。經歷過”一些”戀愛經驗，不要問我一些是多少，總言之緣份遇上大家共同成長到分離，感恩到現在我遇到了生命的另一半，因為她的付出，表達，分享，令我夢醒原來這就是愛，愛要及時，大聲說出，行動表達，讓對方收到。