講到玩具,大人小朋友都鍾意,有人鍾情日式可愛或動漫玩具、有人迷美式漫畫模型、有人就對舊玩具情有獨鍾,喺世界各地搜羅舊玩具,更設立「香港玩具美術館」展示佢示珍藏品!


唔好以為,收藏得呢類咁有歷史感玩具嘅人一定係有返咁上下年紀,錯錯錯!其實佢係一位女生!「香港玩具美術館」主理人黎穎琪,於2015年獲得澳洲皇家墨爾本理工大學藝術學士學位,主修雕塑,10年前開始收藏世界各地嘅舊玩具,過程中發現喺世界唔同角落都搵到Made in Hong Kong 嘅舊玩具,令佢感受更深,香港嘢的確可以威出國際呢!2019年,黎穎琪獲得藝鵠駐場藝術家計劃贊助,於灣仔富德樓開設「香港玩具美術館」,以藝術作為媒介展示香港製造嘅玩具,從另一角度訴說本土玩具文化,令更多人重新認識香港懷舊玩具,延續 Made in Hong Kong 嘅情懷!

「香港玩具美術館」嘅收藏品以五十至七十年代舊式香港製玩具為主,有唔少從未見過嘅玩具,例如:六十年代公仔紙、口袋玩具、色塊拼圖玩具等等,大大擴闊你對香港製玩具嘅想象,即使手工或上色唔及現代玩具咁完美無瑕、標準一樣,但就係呢種手工觸感,經由人手上色製作嘅細節,令玩具更有質感與獨特。重新認識呢啲隨時老過你嘅玩具,絕對係舊玩具都可以有新玩法!


(公仔紙video: 
www.instagram.com/p/B93810nAO-p/ )

六十年代公仔紙 - 動物篇

睇過Running Man 都見過韓國卡紙game,原來香港以前都有類似玩意,就係呢啲公仔紙!公仔紙係六、七十年代風靡一時嘅小玩意,細小紙咭印上各種人物或圖案,顏色豐富款式多樣,玩法係由兩名玩家將紙咭放喺掌心,互相擊掌後放開,紙咭落地後正面朝天者為勝,仲可以贏走負方紙咭,透過同朋友對戰,收集唔同圖案嘅紙咭,真係而家儲卡熱潮嘅先河!

 


(口袋玩具 video: www.instagram.com/p/CCLKNnxAXHA)

懷舊玩意往往可以令你嘅創作力量同幻想嚇返自己一跳!呢款七十年代香港生產嘅鎖匙扣玩具,一套三款,透過拼裝唔同形狀嘅組件組成完整玩具,仲可以當鎖匙扣用,係一款靈活多變嘅動腦小玩意,所以玩都可以玩得好用腦!

 

除咗香港生產懷舊玩具,「香港玩具美術館」今次為大家帶嚟產自德國嘅古董陶瓷玩偶,呢種懷舊陶瓷玩偶具有一定歷史,創作起源都有段小故事。喺1840年,年輕美麗嘅Charlotte 跌入冰冷嘅湖水,美貌被結冰封存,自此,Charlotte 成為咗陶瓷玩偶嘅設計靈感,喺往後六、七十年更演變成為德國、日本等國家中別樹一格嘅陶瓷玩偶類型,具有重大象徵意義呢!

 

今次「香港玩具美術館」聯乘 30Menu,舉行「德國陶瓷玩偶領養計劃」,想一睹極具歷史感嘅古董陶瓷玩偶真身,就嚟我哋Studio 認識吓佢哋啦 :)

 

3月 23, 2021 — 30 Menu